اى سليمان صفات وعيسى دم * وى نبى خصلت وولى مقدم اى سخا ملكدا سپهالار * وى شجاعت ممالكيدا مدار اى اسكندر سپاه خضر الهام * وى مسيحا دم وكليم كلام اى ديانت جهانيغا سلطان * شاه بن شاه وخسرو دوران اى يوزينك آفتاب اوج جلال * عالم اهلى قاشنكدا ذره مثال تا ظهور ايلدينك بو عالم آرا * نوشتي ذوق وسرور آدم آرا چالدينك اى شه جهانده كوس نويد * يتتى دين أهليفه صداى بريد خسرو دين پناه شاه سليم * صدف دهر ايچنده در يتيم تايدى حق يوليدا طريق هدا * خلد الله ملكه ابدا أهل اسلامتى هدايت قيل * طرق شرعنى رعايت قيل بيله كيم عدل وداد وار سنكا * يار بولسون چهار يار سنكا بيلكه دين أهليغه سن سن * مهدى آخر الزمان سنسن بار عدل وسخاك ايچون حيران * يوز تومان حاتم ايله نوشيروان بيله كم سنده يار فتح وظفر * قدرت حقور نه فعل بشر من ديمان كيم زمانه شاهيسين * بلكه سن قدرت الهى سين سنكا اى شاه عرض حالم وار * عرض ايتر ايمدى كيم مجاليم وار لطف ايله منينك مراديمه بيت * داد خوانك من ايمدى داديمه بيت بار ايدى مسكنيم خراساندا * ملك خوارزم بر له بلقاندا گورديم ايرسه بسى بلادى وطن * بولديم اول ملكدين جلاى وطن دين سرايينى كفر ييقتى تمام * كفر دين مسنديده توتتى مقام بدعت وفسق ييقتى عالمنى * فسق حقدين آيردى آدمنى خاندان لر باريسى بولدى خراب * قالمدى شرع ايچنده آب وتاب
(مقدمة المعلق ٦١)
